Ný styttist óðum í sveitarstjórnarkosningar, en þær fara fram laugardaginn 16. Maí næstkomandi. Akureyringar munu þá kjósa sér nýja bæjarstjórn og geta valið milli átta framboðslista. Til þess að hjálpa lesendum að gera upp hug sinn hefur Kaffið sent út stuttan spurningalista á oddvita allra framboða í sveitarfélaginu. Svör þeirra verða birt í oddvitaspjöllum sem þessu á næstu dögum og vikum.
Oddvitaspjallið að þessu sinni er við Lovísu Oktovíu Eyvindsdóttur, oddvita C-lista Viðreisnar
Hver eru helstu stefnumál þíns framboðs fyrir komandi kosningar?
Við viljum brjóta niður múra milli kerfa sem einfaldlega virka ekki. Það er ekki náttúrulögmál að opinber þjónusta sé þunglamaleg. Okkar hjartans mál er að endurskipuleggja þjónustu við börn og ungmenni: auka fagmennsku og færa stuðninginn nær þeim, í skólana, frístundirnar og tómstundirnar. Við erum með skýra aðgerðaráætlun. Fyrsta skrefið er beint samtal við fagfólk og fjölskyldur, með það að markmiði að setja verkefnið „Börnin okkar“ af stað strax í byrjun árs 2027.
Er eitthvað við bæinn okkar sem þér finnst ganga sérstaklega vel eins og staðan er í dag og þú vilt standa sérstakan vörð um?
Snjómokstur á Akureyri er til fyrirmyndar. Sundlaugarnar okkar eru líka einstakar og göngustígakerfið gerir bæinn mjög aðgengilegan fyrir fótgangandi. Við getum þó tengt svæði betur saman og sérstaklega bætt aðgengi fyrir daufblinda og sjónskerta við gatnamót og gangbrautir. Ég er líka mikill aðdáandi utanvega stíganna, til dæmis meðfram Glerá. Næsta skref er að klára þá þannig að hægt sé að fara á öruggan hátt úr bænum og út í náttúruna, í Krossanesborgir og upp í Fálkafell svo eitthvað sé nefnt. Göngufólk á ekki að þurfa að ganga út í bílaumferð.
Á hinn bóginn, er eitthvað við bæinn okkar sem þér finnst ekki ganga nógu vel eins og staðan er í dag og þú vilt kippa í lag?
Á síðustu árum hafa verið teknar skammsýnar ákvarðanir í málefnum barna og ungmenna. Breytingar á FélAk komu án aukins fjármagns og skipulag er ennþá í lausu lofti, frístundastarf er algjör aukastærð sem veldur því að starfsfólk brennur út og færri börn en ella nýta sér frístundir. Fjárveitingar til lykilúrræða eins og Hlíðarskóla hafa verið skornar niður. Þetta er afleiðing þess að kerfið er hugsað í bútum. Við viljum horfa á málefni barna sem eina heild, nýta lagarammann um farsæld barna, brjóta múra á milli kerfa og sviða hjá sveitarfélaginu og færa þjónustuna nær þeim í þeirra eigið umhverfi. Þannig styrkjum við skólana, fjölskyldur og börnin.
Nú eru fyrstu sveitarstjórnarkosningar síðan Akureyri var formlega skilgreind sem svæðisborg síðasta haust. Hvað þarf að þínu mati að gera til þess að styðja við borgarhlutverkið?
Fyrst þarf skýra stefnu og aðgerðaáætlun þar sem hagsmunagæsla fyrir Akureyri er stöðug, alla daga, allt árið um kring. Við þurfum að hætta að hugsa í varnarstöðu. Með skýra framtíðarsýn og traustu fjármagni getum við gert Akureyri að raunverulegum valkosti fyrir fólk og fyrirtæki. Íbúar á Norður- og Austurlandi eiga að geta sótt þjónustu er sótt þjónustu til Akureyrar, ekki þurfa að ferðast til Reykjavíkur.
Síðan þarf að nýta tækifærin sem felast í svæðisborgarhlutverkinu: eru forsendur fyrir því að auka flugumferð og jafnvel vöruflutninga í gegnum flugvöllinn? Er tækifæri til nánari samstarfs og jafnvel sameiningar sveitarfélaga á svæðinu? Er styrkur í því? Hvað þýðir þetta fyrir markaðssetningu svæðisins fyrir erlent ferðafólk? Með réttri sýn getur svæðið blómstrað og Akureyri orðið sterk miðja fyrir landsbyggðirnar.
Hvernig finnst þér Akureyrarbær standa sig í málefnum Hríseyjar og Grímseyjar? Er eitthvað sem þú og þitt framboð viljið gera öðruvísi?
Hrísey og Grímsey eru ólík samfélög og þurfa ólíkar lausnir. Okkar nálgun er einföld: íbúarnir eiga að hafa raunveruleg áhrif á forgangsröðun í sínum byggðum. Það er gert með virku íbúalýðræði. Það er eitt af því sem má styrkja í suðurbæ sveitarfélagsins, því hverfisráð Grímseyjar og Hríseyjar eru virkari einingar en í öðrum hverfum. Sveitarfélagið má ekki standa í vegi fyrir uppbyggingu, það þarf að vera meira frelsi í deiliskipulagi heldur en er hér og það má ekki gleyma því að tækifærin eru mikil í eyjunum – bæði fyrir heilsárs og frístundabyggð. Hlutverk sveitarfélagsins eru að vera varðhundar samgöngumála, því það eru lífæðar samfélagana.
Ein létt að lokum, hvernig tekurðu kaffið þitt?
Með flóaðri mjólk takk. Mun sjaldan neita Baileys skvettu ef staður og stund býður upp á það.
