Ný styttist óðum í sveitarstjórnarkosningar, en þær fara fram laugardaginn 16. Maí næstkomandi. Akureyringar munu þá kjósa sér nýja bæjarstjórn og geta valið milli átta framboðslista. Til þess að hjálpa lesendum að gera upp hug sinn hefur Kaffið sent út stuttan spurningalista á oddvita allra framboða í sveitarfélaginu. Svör þeirra verða birt í oddvitaspjöllum sem þessu á næstu dögum og vikum.
Oddvitaspjallið að þessu sinni er við Sindra S. Kristjánsson, oddvita S-lista Samfylkingarinnar á Akureyri.
Hver eru helstu stefnumál þíns framboðs fyrir komandi kosningar?
Við viljum létta Akureyringum lífið, sérstaklega á þeim tímabilum lífsins þar sem álagið er mest. Breytingar sem núverandi meirihluti gerði á leikskólakerfinu hefur sett margar fjölskyldur í erfiða stöðu, þar sem fólk hefur þurft að minnka við sig vinnu – og það eru oftast mæðurnar sem taka á sig vinnuskerðingu. Það skiptir miklu máli að hér sé leikskólaþjónusta sem fólk sem ekki er með bakland eða vinnur ósveigjanlegan vinnutíma getur nýtt sér án þess að sligast undan kostnaði. Við viljum afnema gjaldskyldu á skráningardögum, setja þak á leikskólagjöld og innleiða 100% systkinaafslátt til að mæta foreldrum ungra barna. Við leggjum einnig höfuðáherslu á að koma á sumarfrístund og innleiða sveigjanleika í sumarfríum leikskóla, en þegar öll leikskólabörn taka sumarfrí á sama tíma getur það valdið vandræðum á stórum vinnustöðum eins og sjúkrahúsinu og á heilsugæslunni. Það að bjóða ekki upp á sveigjanleika og sumarfrístund fyrir ung börn er slæmt fyrir börn, foreldra og atvinnulífið hér í bæ.
Við leggjum þá höfuðáherslu á húsnæði þar sem við viljum tryggja að þriðjungur alls nýs íbúðarhúsnæðis sem byggt er hér sé óhagnaðardrifið. Við ætlum að stytta biðlista eftir félagslegu húsnæði og viljum samþætta þjónustu við eldri borgara að hætti Mosfellsbæjar sem bætir þjónustu, viðmót og eykur skilvirkni.
Síðast en ekki síst viljum við marka Akureyri atvinnu- og vaxtaplan til framtíðar og ákveða hvernig við viljum sjá bæinn okkar vaxa og dafna. Það er mikilvægt að Akureyrarbær sé samkeppnishæfur við höfuðborgarsvæðið þegar kemur að atvinnulífi, en hér eru fasteignagjöld há bæði á íbúðahúsnæði og atvinnuhúsnæði, því viljum við breyta. Það skiptir höfuðmáli að hér byggist upp fjölbreytt atvinnulíf sem tekur mið af breyttum heimi, nýsköpun og tækni – þar skiptir háskólinn líka miklu máli og mikilvægt að standa vörð um skólabæinn Akureyri.
Er eitthvað við bæinn okkar sem þér finnst ganga sérstaklega vel eins og
staðan er í dag og þú vilt standa sérstakan vörð um?
Bærinn okkar er auðvitað í grunninn frábær staður til að búa á, um það er engum blöðum að fletta. Hér er mikill mannauður, frábær útivistarsvæði og öflugt íþrótta- og tómstundastarf. Ég vil standa sérstakan vörð um náttúruperlurnar í bæjarlandinu og aðgengið að þeim.
Á hinn bóginn, er eitthvað við bæinn okkar sem þér finnst ekki ganga
nógu vel eins og staðan er í dag og þú vilt kippa í lag?
Biðlistar fyrir börn sem þarfnast stuðnings í skólakerfinu eru langir ásamt því að í bænum okkar býr fólk sem líður mikinn skort. Þetta þarf að laga eins fljótt og verða má, það þarf að auka aðgengi barna að sérfræðiþjónustu innan skólakerfisins og grípa börnin fyrr. Það þarf þá að gæta sérstaklega að því að við séum ekki að skilja hópa eftir, til dæmis börn þeirra sem eru í lægstu tekjuhópunum.
Strætókerfið á Akureyri þarf að bæta, með tíðari ferðum og bættu leiðarkerfi. Það yrði forgangsmál hjá okkur að ganga í það verk, enda þýða betri almenningssamgöngur bætt loftgæði, minna skutl og meira frelsi fyrir bæjarbúa að komast á milli staða.
Nú eru fyrstu sveitarstjórnarkosningar síðan Akureyri var formlega
skilgreind sem svæðisborg síðasta haust. Hvað þarf að þínu mati að gera
til þess að styðja við borgarhlutverkið?
Svæðisborgarhlutverkið er um leið spennandi og krefjandi fyrir Akureyrarbæ og við erum stödd á tímamótum þar sem Akureyri þarf að ákveða hvað hún ætlar að verða þegar hún verður stór. Það er mikilvægt að við vinnum atvinnu- og vaxtastefnu þar sem við setjum á blað hvernig við ætlum að þroskast inn í svæðisborgarhlutverkið og hvert við viljum stefna. Við þurfum að vinna áfram með ríkinu að aðgerðum sem styðja við svæðisborgarhlutverkið; það þarf að standa vörð um sjúkrahúsið og tryggja að hér sé næg mönnun og viðunandi aðstæður fyrir starfsfólk og sjúklinga, það sama gildir um heilsugæsluna. Millilandaflug til Akureyrar hefur þegar breytt mjög miklu fyrir íbúana og það þarf að tryggja áframhaldandi vöxt og markaðssetningu flugvallarins. Engin er borg án menningar og lista og gott að sjá núverandi stjórnvöld gefa í hvað varðar stuðning við menningu á Akureyri. Fjölbreytni í framhaldsskólanámi er mikilvæg, það þarf að berjast fyrir betri verknámsaðstöðu og að sérstaða skólanna okkar fái að haldast. Háskólinn skiptir auðvitað mjög miklu máli fyrir svæðisborgina og það eru sóknarfæri í auknu samstarfi við Háskólann og tengingum við atvinnulífið.
Hvernig finnst þér Akureyrarbær standa sig í málefnum Hríseyjar og
Grímseyjar? Er eitthvað sem þú og þitt framboð viljið gera öðruvísi?
Akureyrarbær getur gert margt betur þegar kemur að Hrísey og Grímsey. Bæjarstjórn getur beitt sér meira og betur í málefnum samgangna til og frá eyjunum. Það væri þá vel við hæfi að halda viðtalstíma bæjarfulltrúa í eyjunum a.m.k einu sinni á ári. Samfylkingin á Akureyri boðar einmitt að koma aftur á fót reglulegum viðtalstímum bæjarfulltrúa, en fyrsta aðgerð fráfarandi meirihluti var að leggja niður þessa viðtalstíma og takmarka þannig aðgengi íbúa að kjörnum fulltrúum.
Ein létt að lokum, hvernig tekurðu kaffið þitt?
Eins og lífið, allskonar. En aðallega svart og sykurlaust.
