Aðalfundur Sparisjóðs Þingeyinga var haldinn 22. apríl s.l. í Breiðumýri í Reykjadal. Rekstur sparisjóðsins gekk vel á síðasta ári, hagnaður af starfseminni var 223,7 milljónir króna eftir skatta.
Um síðustu áramót voru heildareignir sparisjóðsins 15,7 milljarðar króna og hafa aukist um einn milljarð króna á milli ára. Innlán voru á sama tíma 13,6 milljarðar. Eigið fé sparisjóðsins var ríflega 1,7 milljarður í árslok og lausafjárstaða sparisjóðsins er áfram sterk.
20 milljónir króna í samfélagsstyrki á síðasta ári
Á aðalfundinum voru afhentir styrkir að fjárhæð 9 milljónir króna. Ennfremur kom fram í skýrslu Margrétar Hólm Valsdóttur, fráfarandi stjórnarformanns, að á síðasta ári greiddi Sparisjóður Þingeyinga út samtals 20 milljónir króna í samfélagsstyrki á starfssvæði sínu.
Í Þingeyjarsýslum eru átta björgunar- hjálparsveitir, á myndinni (MYND 1: (Aðalfundur 2026_1) eru fulltrúar þeirra flestra ásamt Erni Arnari Óskarssyni sparisjóðsstjóra, lengst til hægri á myndinni. Sparisjóðurinn veitti sveitunum samtals 4 milljóna króna styrk til að efla ungliðastarf björgunarsveitanna.
Auk þess tóku fulltrúar eftirtalinna félaga á móti 1 milljóna króna styrk hver, samtals 5 milljónir.
• Rauði krossinn í Þingeyjarsýslu
• Húsmæðraskólinn á Laugum (Kvenfélagasambandið)
• Krabbameinsfélag Norðausturlands
• Krabbameinsfélag Suður-Þingeyinga
• Fab Lab á Húsavík
MYND 2 (Aðalfundur 2026.jpg): Fulltrúar styrkþega, frá vinstri Sæmundur Þór Sigurðsson, Stefán Pétur Sólveigarson, Ásgerður Arnardóttir, Sigrún Jónsdóttir og Örn Arnar Óskarsson.
Nýkjörin stjórn sparisjóðsins
Eftirtalin hlutu kjör í stjórn sparisjóðsins næsta starfsár: Berglind Pétursdóttir, Dagbjört Jónsdóttir, Eiríkur H. Hauksson, Pétur Jónsson og Sigríður Jóhannesdóttir.
Varamenn, Bergþór Bjarnason og Pétur B. Árnason.
