Þrítugasta og önnur brautskráning frá Menntaskólanum á Tröllaskaga fór fram við hátíðlega athöfn síðastliðinn laugardag. Þrjátíu og fjórir nemendur settu upp stúdentshúfurnar að þessu sinni og hafa nú 743 nemandur brautskráðst frá skólanum á þeim sextán árum sem hann hefur starfað. Útskriftarnemarnir að þessu sinni koma frá tólf stöðum á landinu og einn þeirra er búsettur erlendis. Mikill meirihluti nemenda skólans eru fjarnemar. Sextán útskriftarnemar sáu sér fært að mæta til athafnarinnar en aðrir fylgdust með í streymi.
Jóna Vilhelmína Héðinsdóttir aðstoðarskólameistari stýrði athöfninni og flutti ávarp þar sem hún sagði frá starfi skólans. Í máli hennar kom m.a. fram að á þessari önn voru tæplega 600 nemendur skráðir í nám. Um 90% nemenda eru fjarnemar og um 60% þeirra af höfuðborgarsvæðinu. Kjörnámsbraut var fjölmennasta brautin og þar á eftir félags- og hugvísindabraut. Starfsmenn voru 30. Erlend verkefni voru sem fyrr áberandi í skólastarfinu og hefur fengist fjöldi styrkja til þeirra frá Erasmus+ og Nordplus. Hafa þessir styrkir gert bæði nemendum og kennurum kleift að fara í ferðir til útlanda sem og að taka á móti nemendahópum og kennurum erlendis frá. Á þessari önn heimsóttu nemendur m.a. samstarfsskóla í Finnlandi ásamt nemendum frá Eistlandi og vaxandi ásókn hefur verið frá erlendum kennurum í að koma hingað og kynna sér starf skólans. Einnig er MTR UNESCO-skóli sem fléttar heimsmarkmið Sameinuðu þjóðanna inn í allt skólastarf þar sem m.a. er lögð áhersla á mannréttindi, umhverfismál og frið. Segja má að verkefnið hafi náð hámarki síðasta haust er skólinn hlaut Evrópsku nýsköpunarverðlaunin í kennslu fyrir verkefnið „Heimsmarkmiðin í öllu skólastarfi – lýðræðislegt samfélag í framkvæmd“.
Þakkaði hún að lokum útskriftarnemum fyrir þann tíma sem þeir hafa varið í Menntaskólanum á Tröllaskaga og óskaði þeim velfarnaðar í öllu því sem þeir taka sér fyrir hendur í framtíðinni.
Skólameistarinn Lára Stefánsdóttir flutti einnig ávarp þar sem hún óskaði útskriftarnemum allra heilla og þakkaði þeim fyrir að velja MTR. Lagði hún í ávarpinu sínu áherslu á þá góðmennsku og tillitssemi sem hún upplifir hjá ungu kynslóðinni og hvað þau eru lagin í að tala um tilfinningar sínar. Síður megi finna hjá unga fólkinu þá dómhörku sem gjarnan megi finna hjá eldri kynslóðum og tengist þeim viðhorfum sem þær ólust upp við. Tíðarandinn sé annar nú en áður, það má t.d. ræða um tilfinningar og víðsýni þeirra yngri sé meiri m.a. vegna opnara þjóðfélags, meiri ferðlaga og upplýsinga um fjölbreytileika mannlífsins. Áhersla skólans á erlent samstarf sé engin tilviljun því sé ætlað að opna nemendum sýn á mismunandi aðstæður fólks, lífsmáta og menningu og gera þá fróðari og víðsýnni. Einnig ræddi hún um mikilvægi þess að fara í gegnum lífið með meðvitund, bæta við sig þekkingu, vera forvitin, taka eftir því sem er að gerast í kringum mann og vera með opinn hug. Þetta séu allt eiginleikar sem munu nýtast í störfum framtíðarinnar og ekki síður hinir mannlegu eiginleikar sem vélarnar ráða ekki yfir. Að lokum var henni tíðrætt um þann sjálfsaga sem þarf til að vera fjarnemi og hversu dapurlegt væri þegar fólk talaði fjarnámið niður. Bar hún það m.a. saman við fjarvinnu og spurði hvort fólk trúði því að fólk í fjarvinnu væri ekki að sinna sinni vinnu. Fjarnám væri oft á tíðum eina leiðin sem væri fær vegna aðstæðna, veikinda og fleiri þátta og ýmsir gætu ekki sótt sér menntun ef það væri ekki til staðar. Skipulag fjarnámsins í skólanum og sú mikla áhersla sem starfsfólk skólans legði á að allir nemendur nytu sömu þjónustu og nærgætni, hvort sem þeir væru fjarnemar eða staðnemar, hefði gefist afar vel.
Þá var komið að afhendingu prófskírteina, sem Lára skólameistari og Jóna Vilhelmína aðstoðarskólameistari sáu um. Dúx skólans að þessu sinni var Róbert Sean Birmingham úr Reykjanesbæ. Hann útskrifaðist af Kjörnámsbraut og hlaut viðurkenningar fyrir framúrskarandi námsárangur í dönsku og íslensku.
Að lokum var komið að ávarpi nýstúdents sem Hanna Valdís Hólmarsdóttir flutti.Hún byrjaði á því að óska samnemendum sínum til hamingju með áfangann og sagði að marga hefði eflaust hlakkað til þessa dags lengi. Því væri ekki þannig farið með hana því hana hefði kviðið því í þó nokkurn tíma að kveöja skólann sinn. Henni hefði liðið sérlega vel í skólanum ekki síst vegna þess að þar væri samfélag þar sem allir þekktu alla og þar ríkti fallegt traust. Hún sagðist hafa farið í sex utanlandsferðir á þessum þremur árum í MTR sem hefðu verið fjölbreyttar en allar mjög eftirminnilegar og fræðandi. Sérstaklega áhugavert var að vera í heimagistingu í þessum ferðum og fá þannig menningu íbúanna beint í æð, það hefði veitt henni alveg nýtt sjónarhorn á viðkomandi þjóðir. Sagðist Hanna Valdís vera afskaplega þakklát fyrir þau tækifæri sem henni gáfust með þessum ferðum. Hanna Valdís hefur verið í stjórn nemendafélagsins Trölla öll þrjú skólaárin og þar af formaður í tvö og hálft ár. Var henni færð sérstök viðurkenning frá skólanum fyrir framúrskarandi störf á þeim vettvangi við útskriftina. Þakkaði hún starfsfólki skólans fyrir frábært samstarf varðandi félagsstörf skólans og þá sérstaklega Hólmari náms- og starfsráðgjafa sem er tengiliður skólans við nemendaráð. Að lokum þakkaði hún kennurum og starfsfólki skólans fyrir frábært samstarf. MTR væri skóli þar sem nemendum væri mætt þar sem þeir eru staddir, kennararnir leggja sig fram um að kynnast nemendum sínum vel og allir innan skólans vinna saman að því að gera hann að samfélagi þar sem öllum líður vel. Sagðist hún í raun öfunda þá nemendur sem gætu haldið áfram að mæta í skólann næsta haust.
Við athöfnina sungu og spiluðu fyrrum nemendur skólans, Hörður Ingi Kristjánsson og Tryggvi Þorvaldsson, tvö lög og gerðu það einstaklega vel.
