Karl-Werner Schulte afhenti í gær Minjasafninu á Akureyri til varðveislu síðustu kortin úr Íslandskortasafni sínu en með gjöfinni fagnaði Karl-Werner 80 ára afmæli sínu sem var í fyrradag. Meðal þátttakenda í dagskránni á Minjasafninu voru Clarissa Duvigneau, sendiherra Þýskalands á Íslandi, og Gunnar Már Gunnarsson, forseti bæjarstjórnar, sem tók við kortunum fyrir hönd Akureyrarbæjar. Þá kom Wolfgang Crom frá Ríkisbókasafninu í Berlín einnig sérstaklega til Akureyrar af þessu tilefni og fjallaði um eintak af korti eftir Ortelius sem stundum hefur verið kallað Guðbrandskortið. Á vef Akureyrarbæjar segir:
Á sýningunni Land fyrir stafni gefur að líta einstök kort af Íslandi frá 16. öld. Þar er þýskt kort með safnnúmerið 200 sérstaklega áhugavert en á því birtist elsta þekkta prentaða kortið af Íslandi, frá árinu 1507. Það er merkilegt að Ísland hafi ratað á prentað kort aðeins tæpum 60 árum eftir að prenttæknin ruddi sér til rúms í Evrópu, löngu áður en Guðbrandsbiblía kom út árið 1584.
Sýningin Land fyrir stafni er unnin upp úr Íslandskortasafni Schulte, sem þýsku hjónin dr. Karl-Werner Schulte og dr. Gisela Schulte-Daxbök hafa fært Akureyrarbæ frá árinu 2014. Safnið telur nú 212 kort frá árunum 1507–1849, eftir marga helstu kortagerðarmenn Evrópu fyrri alda. Í safninu er að finna fjölmörg kort sem ekki er vitað til að séu varðveitt annars staðar, sem gerir það einstakt á heimsvísu.
Kortasafnið sýnir sögu vísindalegrar þekkingar á Íslandi og þróun evrópskrar kortagerðar í gegnum aldirnar. Um leið er það persónuleg saga hjóna sem tóku ástfóstri við Ísland og Akureyri. Það sem hófst sem ferðalag og áhugi varð að einstöku safni sem nú er varðveitt sem heild, öðrum til ánægju og gagns.
