Óðinn Andrason og Rakel María Óttarsdóttir, tveir fyrrverandi MA-ingar fengu nýlega styrki fyrir afburðaárangur þeirra í háskólanámi. Þetta kemur fram á vef MA, þar segir einnig:
Óðinn Andrason (stúdent 2022), BS-nemi á þriðja ári í vélaverkfræði við Háskóla Íslands, hlaut rétt fyrir jól styrk úr Minningarsjóði Þorvalds Finnbogasonar stúdents. Jón Atli Benediktsson, rektor Háskóla Íslands, afhenti styrkinn ásamt frú Vigdísi Finnbogadóttur, systur Þorvalds. Óðinn stefnir á framhaldsnám í vélaverkfræði í Bandaríkjunum. Sjá frétt HÍ.
Rakel María Óttarsdóttir Ellingsen (stúdent 2021) var önnur tveggja efnilegra stærðfræðinema sem hlaut í vikunni úthlutað styrk úr Minningarsjóði Hjalta Þórs Ísleifssonar, ungs stærðfræðings sem lést fyrir rúmu ári. Móðir hans vill að andlát hans verði öðrum hvatning í stærðfræðiheiminum. Rakel María stefnir á framhaldsnám í Oxford. Sjá frétt RUV.
UMMÆLI