Íþróttafélagið Þór og SaltPay hafa gert með sér tveggja ára samning um að næstu tvö árin muni Þórsvöllur bera nafnið SaltPay-völlurinn. Þetta kemur fram á vef Þórs.
Þar segir að SaltPay sé leiðandi fjártæknifyrirtæki í þróun og hagnýtingu lausna á sviði rafrænnar greiðslumiðlunar með yfir 40 ára reynslu á því sviði og annast m.a. færsluhirðingu vegna Mastercard og Visa.
Er þetta í fyrsta sinn sem Þór gerir slíkan samning, þ.e. að selja nafn á völlinn. Næstu tvö sumrin fara heimaleikir Þórs og Þór/KA fram á SaltPay-vellinum.
„Það eru miklir umbótatímar að eiga sér stað hjá SaltPay um þessar mundir en við breyttum nýlega nafni okkar úr Borgun, sem mörgum er kunnugt, í SaltPay. Með breyttum áherslum viljum við styrkja og styðja vel við bakið á íþróttastarfsemi á Íslandi. Það er okkur því mikið gleðiefni að undirrita þennan samning við Þór og fá tækifæri til að sýna vilja okkar í verki og er þetta fyrsta skref okkar í þeirri vegferð sem koma skal“ segir Gísli Páll Helgason viðskiptastjóri SaltPay á vef Þór.
Reimar Helgason framkvæmdastjóri Þórs kvaðst vera mjög ánægður með þetta samstarf við SaltPay og þá aðila sem þar eru. „Við höfum áður fengið tilboð í nafn á völlinn, sem var ekki tekið þannig að við værum ekki að skrifa undir hér í dag ef við værum ekki ánægð með þennan samning sem var verið að undirrita.“
Það voru þeir Reimar Helgason framkvæmdastjóri Þórs og Gísli Páll Helgason viðskiptastjóri SaltPay sem undirrituðu samninginn.
