Tæplega 5.000 manns hafa sótt sér íbúaapp Akureyrarbæjar, sem gerir íbúum kleift að fylgjast með mikilvægum upplýsingum á einfaldan og þægilegan hátt. Þetta kemur fram í frétt á vef Akureyrarbæjar, þar sem greint er frá eiginleikum smáforritsins.
Í appinu er tilkynningarvirkni, sem þýðir að íbúar geta hakað við ákveðna málaflokka og fengið tilkynningar í símann, til að mynda um götulokanir, snjómokstur og fleira. Í appinu er einnig hægt að greiða fyrir bílastæðasjóð, stöðvunarlagabrot og biðja um endurupptöku. Engin þjónustugjöld eru tekin þegar appið er notað til að greiða fyrir bílastæði.
Í appinu má að sama skapi finna ábendingagátt, sem gefur fólki kost á að senda sveitarfélaginu ábendingu um það sem betur má fara, og rafrænt gámakort, sem kemur í stað klippikortanna. Gömlu pappakortin eru þó áfram í gildi.
Íbúaapp Akureyrarbæjar er aðgengilegt fyrir bæði Apple og Android stýrikerfi. iPhone notendur slá inn leitarorðið Akureyrarbær í App Store í símanum sínum en Android notendur finna appið í Play Store.
