Gerður Sigtryggsdóttir, oddviti sveitastjórnar í Þingeyjarsveit og Knútur Emil Jónasson hafa myndað nýjan meirihluta undir merkjum K-listans í Þingeyjarsveit. Gerður og Knútur kusu ekki í takt við aðra innan E-listans hvað varðar virkjunarmál tengd Skjálfandafljóti. Vildu þau halda áfram fyrri stefnu um að virkja ekki Skjálfandafljót. Mbl greindi frá og segir þar:
„Í síðasta aðalskipulagi Þingeyjarsveitar kom fram að Skjálfandafljót skyldi ekki virkja. Við Knútur vildum halda þeirri stefnu óbreyttri en þeir vildu breyta henni vegna þess að þeir hafa talað fyrir lítilli virkjun í miðjum Bárðardal. Sem að við teljum vera of litla, fyrir of litla hagsmuni fárra, til þess að fara raska þessu óraskaða fljóti. Það er svona meginmálið í þessu,“ segir Gerður.
Hún segir þetta mál ekki endilega vera sveitarstjórnarmál heldur umhverfisverndarmál og náttúruverndarmál.
„Þegar menn fara fram með að ætla að virkja svona stórt vatnasvið eins og Skjálfandafljót er – það er 180 kílómetrar – og ávinningurinn er nánast enginn fyrir sveitarfélagið nema fasteignagjöld af stöðvarhúsi. Það er ávinningur fyrir þrjá landeigendur og framkvæmdaaðila,“ segir hún.
Hún segir nær víst að Skjálfandafljót verði virkjað einn daginn en þá verði meiri sátt um það ef það væri stærri virkjun sem yrði vel vönduð.
„Heldur en að fara skella niður litlum virkjunum hér og þar. Þetta sveitarfélag er að framleiða alveg gríðarlega mikla orku nú þegar.“
UMMÆLI