Í dag mun N1 hefja sölu á eldsneyti á föstu lágu verði á þremur N1 stöðvum til viðbótar við N1 Lindum. Fyrirtækið festi lágt verð í sessi í Lindum við opnun þann 18. desember sl. og er óhætt að fullyrða að það fyrirkomulag hafi slegið í gegn.
„Þetta fyrirkomulag hefur mælst afar vel fyrir hjá viðskiptavinum okkar og raunar farið fram úr björtustu vonum okkar. Fasta lága verðið flýgur hátt og því viljum við koma enn frekar til móts við viðskiptavini okkar með því að bæta þremur N1 stöðvum við frá og með deginum í dag,“ segir Hinrik Örn Bjarnason, framkvæmdastjóri N1.
N1 Reykjavíkurvegi, N1 Norðurhellu og N1 Tryggvabraut á Akureyri bætast því í hópinn í dag. N1 Norðurhellu er ný stöð og eykur enn þjónustu við bifreiðaeigendur sem þarna fara um. Sem fyrr verður hægt að greiða með N1 korti og N1 lyklum á þessum stöðvum.
„Við leitum ætíð allra leiða til að hlusta á viðskiptavini okkar og fast lágt verð er augljóslega eitthvað sem fellur bifreiðaeigendum vel í geð. Stöðvarnar tvær í Hafnarfirði og ekki síður á Tryggvabrautinni á Akureyri henta vel fyrir þessa útfærslu og við hlökkum til að geta boðið viðskiptavinum okkar upp á þetta nýja fyrirkomulag,“ segir Hinrik Örn.
UMMÆLI