KA/Þór spilaði í dag fyrri leik sinn gegn Kósóvómeisturunum KHF Istogu. Liðið gerði sér lítið fyrir og vann leikinn 26:22. Um var að ræða fyrsta Evrópuleik KA/Þór í sögu félagsins.
KA/Þór fóru illa af stað og voru 1:4 undir eftir tíu mínútna leik. Liðið vann sig þó mjög vel inn í leikinn í kjölfarið, skoraði næstu fjögur mörk og kom sér þannig í 5:4 forystu.
Jafnræði var með liðunum það sem eftir lifði fyrri hálfleiks þar sem liðin skiptust á að ná eins marks forystu. Heimakonur í Istogu leiddu með einu marki, 11:12, í leikhléi.
Í síðari hálfleik var áfram allt í járnum. KA/Þór sneri taflinu við snemma í honum og komst mest tveimur mörkum yfir, 18:16. Istogu gáfust ekki upp og jöfnuðu metin í 18:18 og skiptust liðin áfram á að ná eins marks forystu. Undir lokin, eftir að Istogu komst í 21:22, tókst norðankonum hins vegar að sigla vel fram úr með því að skora síðustu fimm mörk leiksins og höfðu að lokum frábæran fjögurra marka sigur, 26:22.
Unnur Ómarsdóttir var markahæst hjá KA/Þór með 8 mörk og næst komu þær Aldís Ásta Heimisdóttir með 5 mörk, Sofie Söberg Larsen 4 og Martha Hermannsdóttir með 3 mörk. Hulda Bryndís Tryggvadóttir 2 og Rakel Sara Elvarsdóttir gerðu tvö mörk og þær Anna Þyrí Halldórsdóttir og Ásdís Guðmundsdóttir gerðu eitt mark.
Í markinu varði Matea Lonac 14 skot.
KA/Þór leiðir því fyrir síðari leikinn sem er klukkan 16:00 á morgun en leikurinn á morgun telst vera heimaleikur KA/Þórs. Leikur morgundagsins verður í beinni útsendingu á EHF-TV.
UMMÆLI