Mackintosh
Mackintosh er að öllum líkindum eitt mest selda konfekt landsins, þá sérstaklega í kringum jólin. Þá eiga flestir sinn uppáhaldsmola og er það ákveðið vandamál á sumum heimilum þegar allir bestu molarnir eru búnir. Það sem fólk veit hinsvegar ekki er það að þinn uppáhaldsmoli segir mikið til um hvernig persóna þú ert. Kaffið stóð fyrir hávísindalegri persónugreiningu út frá þessari tilgátu.
Bleiki molinn
Vanilla fudge
Þú ert rosalega mainstream manneskja. Þú fylgir öllum nýjungum til þess eins að reyna að vera töff og öðruvísi en það tekst aldrei, því að þú ert mjög eðlileg manneskja og leiðinlega ófrumleg. Þú ert svakaleg frekja að eðlisfari þó að allir fegri það fyrir þér með því að segja að þú sért bara ákveðin. Undantekningarlaust tekur þú myndir af matnum þínum og skellir á instagram og/eða snapchat, og gerir þannig líf allra í kringum þig aðeins verra. Þér reynist mjög auðvelt að ná þér í maka en tekst yfirleitt ekki að halda honum lengi, mögulega vegna þess hversu mikil frekja þú ert.
Finnst best: að eyðileggja þætti og kvikmyndir fyrir vinum og vandamönnum með því að segja þeim frá aðal „plottinu“ eða dauðsfalli aðalpersóna.
Fjólublái molinn
Hazelnut in caramel
Þú ert mjög löt persóna. Þú gerir ekki neitt fyrir neinn, ekki einu sinni sjálfan þig. Í kjölfarið ertu því mjög svartsýn/nn og tekur engu með opnum hug, nema auðvitað þessum skelfilega mackintosh mola. Að fara út að borða á veitingastaði er u.þ.b. það eina sem þú nennir að gera og þá er það þitt helsta áhugamál að kvarta yfir öllu, enda finnst þér allt ömurlegt. Þú átt ekki marga vini því þú ert ótrúlega mikið of bitur fyrir alla. Af einhverjum óútskýranlegum ástæðum ertu aldrei í vandræðum með maka samt, en þeir koma og fara jafn mikið og þú kommentar á kommentakerfi DV og Vísis. Þú nennir að sjálfsögðu ekki að vinna en færð nokkuð öruggar tekjur af því að safna flöskum.
Finnst best: að týna upp rusl óumbeðin/nn og blóta þeim sem því henda á göturnar.
Appelsínuguli molinn
Orange créme
Smekkur þinn á súkkulaðimolum er jafn góður og á áhugamálum, en þín helstu áhugamál eru byggingarlist og sjávarútvegur. Fólk forðast þig á rólegum stöðum en nýtur nærveru þinnar á háværum stöðum þar sem það heyrir ekki í þér. Þú ert einstaklega góð manneskja en leiðinleg. Þinn uppáhaldsstaður er bókasafnið, þar sem þú eyðir flestum stundum með tilgerðarlegt te þér til samlætis. Á djamminu drekkur þú Campari.
Finnst best: að sitja tímunum saman í fótabaði sem er löngu orðið kalt.
Rauði molinn
Strawberry delight
Þú ert mjög væmin manneskja. Þú þykist vera rosalega harður/hörð af þér en innst inni ertu mikil væluskjóða. Þér finnst ekkert skemmtilegra en að horfa á Marley and me og gráta. Til viðbótar ertu mikill náttúrusinni og kvartar sífellt yfir því hvað við göngum illa um jörðina. Fyrst fannst vinum þínum þetta allt í lagi og dáðust að þér fyrir að berjast fyrir þessu málefni en núna er þetta bara pirrandi. Þú ert pirrandi. Svo ertu líka alvarlega að pæla í því að gerast vegan og byrja í crossfit, bara til þess að hafa ennþá meira að segja sem vinir þínir nenna ekki að hlusta á.
Finnst best: að dansa í náttúrunni og gráta í rigningunni.
Gyllti hringlaga molinn
Toffee penny
Þú ert venjuleg og leiðinleg manneskja sem tekur enga sénsa í lífinu. Það líkar engum illa við þig, sennilega vegna þess að fólk hefur enga skoðun á þér, þú ert bara þarna.
Finnst best: að deila keðjustatusum á facebook í von um að einhver á vinalistanum kommenti eitthvað sniðugt um þig.
Gyllti vindillinn
Toffee finger
Þú ert manneskja sem lifir í fortíðinni. Þú ert sífellt að líta til baka og þykir mjög barnaleg/ur. Þetta var uppáhaldsmolinn þinn í æsku og er enn, því þú getur ekki myndað þér nýjar skoðanir á fullorðinsárunum. Þinn uppáhaldsmatur er fiskbúðingur beint úr dósinni og Fanta með. Þú átt rosalega erfitt með að finna þér maka en safnar í staðinn sjaldgæfum fiskum. Þú vonar að einn daginn verði fiskasafnið þitt svo stórfenglegt að þú náir að lokka nýjan maka með þér heim að skoða.
Finnst best: að finna eitthvað að þér, gúgla einkennin og lifa lífinu í ótta við sjúkdómana sem þú ert búin að greina sjálfan þig með.
Blái molinn
Coconut éclair
Guði sé lof að að þú lítur alltaf mjög vel út. Foreldrar þínir hreinlega þurftu að gefa þér eitthvað, svona fyrst að þeir gáfu þér ekkert bragðskyn. Þú eyðir flestum stundum í að fela fyrir fólki að þetta sé uppáhalds mackintosh molinn þinn, enda ekki gott fyrir þig að það spyrjist út. Þú ert mikill símasjúklingur í ofan álag, átt erfitt með eðlileg samskipti, en ert hrókur alls fagnaðar í öllum þessum 30 facebook grúppum sem þú ert skráður í. Þú ert fyndin/nn á netinu en ekkert fyndin/nn í persónu. Þú ert hinsvegar vel vaxinn eins og er en verður það ekki mikið lengur því þú ert alveg hætt/ur að hreyfa þig til að geta sinnt símanum þínum meira.
Finnst best: að vera í vinnu sem færir þér enga ánægju
Græni molinn
Milk choc block
Þú ert ótrúlega nægjusöm manneskja. Þú veist að þetta er ekki besti molinn en þú lætur hann duga þér, því hann er allt í lagi, eins og þú. Þú ert með sæmilegan persónuleika, getur verið frekar fyndin/nn en þú finnur aldrei fyrir skapsveiflum. Þú ert alltaf eins. Þú keyrir líka alltaf undir hámarkshraða því að þér finnst hámarkshraðinn vera settur alltof hátt allsstaðar.
Vikulega kaupir þú blóm handa sjálfum þér í blómabúðinni því enginn annar gerir það.
Finnst best: að fá sér kaffi og koníak yfir Útsvari á föstudögum
Græni þríhyrningurinn
The green triangle
Þú ert besserwisserinn í öllum samkvæmum. Þú hefur alltaf rétt fyrir þér og ferð svo sannarlega ekki leynt með það. Þú velur þér þríhyrninginn sem uppáhaldsmola því að þú elskar Pýþagoras og kannt alla aukastafina í P utan að.
Félagslífið þitt er ekkert nema þegar þú ferð á barinn á sunnudagskvöldum og kaupir nógu djöfulli mikið á stuttum tíma svo að barþjóninn neyðist til að tala við þig.
Finnst best: að tylla þér með vasareikni og góða jöfnu til að glíma við.
Appelsínuguli (sexhyrningurinn)
Orange chocolate crunch
Þú ert rosalega upptekin af sjálfum/sjálfri þér. Það er ekki erfitt þegar maður er jafn frábær og ég; hugsar þú yfirleitt, enda ert þú svo mikið að misskilja lífið, rétt eins og þú misskilur að þetta sé besti molinn. Þessi moli er eins og lélegt cocopuffs, sem enginn vill fá sér með kaffinu. Þú ert búin að lesa alltof margar sjálfshjálparbækur sem hamra sífellt á því hvað þú ert flottur einstaklingur. Hvernig ætti höfundur bókarinnar eiginlega að vita það?
Þú þarft alvarlega að taka þig saman í andlitinu og hætta þessu rugli, það er ekki hollt fyrir neinn að vera í ástarsambandi við sjálfan sig.
Finnst best: að taka myndaflipp með öðrum vel völdum flippurum.
Þessi gyllti með fyllingunni
Caramel swirl
Þessi er blautur, eins og þú. Þú átt við áfengisvandamál að stríða og blótar því alltaf þegar þú færð þér þennan mola að mackintosh sé óáfengt konfekt. Hvar eru rommfyllingarnar? Ættingjarnir þínir eru auðvitað löngu búnir að sjá í gegnum þetta og gefa þér þess vegna bara mackintosh á jólunum. Þú ert mikill námsmaður og verður það sennilega að eilífu því þú getur ekki ákveðið þig hvað þig langar að gera og einbeita þér að. Eða nennir kannski bara ekki að vinna, ég get ekki sagt til um allt.
Svo hentar nám líka rosalega vel með drykkjunni og þú þarft líka ekki að byrja að borga af námslánunum meðan þú ert enn í námi.
Finnst best: að búa til power-point glærur með einn kaldan á kantinum.
Þessi nýji
Honeycomb crush
Þú ert alveg óþolandi jákvæð manneskja. Það skiptir ekki máli hvaða skít lífið hendir í þig, þú tekur öllu með brosi á vör. Þess vegna er það alveg nokkuð víst að þú ert stórskrítin/nn. Það er enginn svona jákvæður að eðlisfari. Þú ert með óhóflega stór eyru og línuskautar mikið á sumrin. Þig langar að vinna á skrifstofu en tollir hvergi í vinnu því samstarfsfélagar þínir nenna ekki peppinu í þér allan daginn, það á ekki að vera gaman í vinnunni allan helvítis daginn. Þú ert hugsanlega ofvirk/ur og ættir alvarlega að skoða þér einhverskonar lyf.
Finnst best: að setjast hjá ókunnugum í sundi og reyna að eignast nýja vini.
Þessi sem hvarf
Toffee deluxe
Þú vilt alltaf það sem þú getur ekki fengið og tuðar yfir öllu sem þú getur ekki fengið. Þetta var ekki einu sinni uppáhaldsmolinn þinn en hann er það núna svo að þú getir tekið þátt í tuðinu. Ekki nóg með það heldur ertu líka orðin/nn einni helsti talsmaður þess að fá Fresca aftur, þó að þú hafir aldrei drukkið það. Þú trúir ekki á sturtu eða bað því þú veist að eftir ákveðinn tíma fer líkaminn að þrífa sig sjálfur, þannig virkaði þetta í gamla daga. Þú stendur þig vel.
Finnst best: að lofa einhverju sem þú getur ekki staðið við.
Hvaða moli finnst þér bestur ?
UMMÆLI