Jóhannesarpassía Bachs, sem er stundum kölluð drottning allra tónverka, verður flutt af Sinfóníuhljómsveit Norðurlands, Kór Akureyrarkirkju, Kammerkór Norðurlands og einvala liði einsöngvara í Dymbilvikunni í Hofi.
Frásögnin af síðustu stundum píslarsögu Krists eins og hún er sögð í guðspjalli Jóhannesar.
Handtaka hans, yfirheyrsla, krossfesting og loks dauði er umfjöllunarefnið í þessu einu ástsælasta stórvirki Bachs. Í Jóhannesarpassíunni er það sögumaður sem syngur frásögnina en kórar og einsöngvarar eru í hlutverki persónanna. Reglulegu er atburðarásin skreytt með aríum og kóratriðum þar sem efni guðspjallsins er skoðað og tilfinningar um það eru tjáðar. Þannig er farið talsvert dýpra í guðspjallið en ef sagan væri eingöngu sögð eins og hún kemur fyrir í frásögn Jóhannesar í ritningunni.
Einsöngvarar: Hildigunnur Einarsdóttir, Harpa Ósk Björnsdóttir, Oddur Arnþór Jónsson og Þorbjörn Rúnarsson.
Kórar: Kór Akureyrarkirkju og Kammerkór Norðurlands.
Hljómsveitarstjóri: Bjarni Frímann Bjarnarson
Tónleikarnir verða klukkan 16:00 þann 17 apríl.
