Sendiherra Þýskalands, Clarissa Duvigneau, opnar sýninguna Einstök Íslandskort 1535-1849 – Schulte landakortin á Minjasafninu á Akureyri á morgun, þann 6. júní kl. 17. Þar verða til sýnis gömul og sjaldgæf Íslandskort frá áður tilgreindu tímabili úr einkasafni hjónanna dr. Karl-Werner Schulte og dr. Giselu Schulte-Daxbök.
Dagskráin hefst á stuttum ávörpum sem Haraldur Þór Egilsson, safnstjóri, dr. Karl-Werner Schulte og Clarissa Duvigneau, sendiherra Þýskalands flytja. Þýska sendiráðið býður upp á léttar veitingar á opnuninni og Karl-Werner Schulte býður upp á þýsk vín úr rómuðu heimahéraði hans.
Sýning mun standa frá 6. júní til 6. október.
Nánari upplýsingar er a finna á Facebook viðburði sýningarinnar, þar sem eftirfarandi lýsingu er að finna:
Á sýningunni gefur að líta 43 stór og smá Íslandskort helstu kortagerðarmanna Evrópu frá árunum 1535-1849. Elstu kortin sýna óljósar útlínur sem oft byggjast á vafasömum upplýsingum, jafnvel hreinum lygasögum og fölsunum. Þar má einnig sjá ævintýraeyjar og furðudýr.
Þegar fram líða stundir verða útlínur landsins kunnuglegri með vaxandi þekkingu byggðri á vísindaleiðöngrum á vegum evrópskra konunga á norðlægar slóðir eða leit að siglingaleiðum til austurlanda.
Kortin eru einstök og jafnvel ekki að finna í öðru eintaki í heiminum svo vitað sé. Stór hluti kortasafnsins sem telur 187 kort, er hvorki að finna í íslenskum né erlendum landakortasöfnum. Þá er þetta gullið tækifærið til að sjá slík kort því Minjasafnið á Akureyri er eini staðurinn þar sem árlega er hægt að skoða þessi fallegu og sögulegu kort.
Íslandskortin eru samofin ástarsögu gefenda þýskra hjóna, dr. Karl-Werner Schulte og dr. Giselu Schulte-Daxbök, sem tóku að safna Íslandskortum fljótlega eftir að ástin kviknaði milli þeirra á 7. áratugnum. Í fyrstu átti þetta að vera eitt kort til að skreyta heimilið og halda tengslum við Ísland og Akureyri þangað sem brúðkaupsferðalagið hafði leitt þau. Veggir heimilisins fylltust smátt og smátt af sögulegum landakortum af Íslandi. Árið 2014 gáfu Schulte hjónin íbúum Akureyrar kortin 76 sem prýddu heimilið en eftir fráfall Giselu hefur Karl-Werner aukið við safnið í hennar nafni. Á sýningunni gefur að líta úrvalskort úr safninu ásamt nýjustu kortunum 10 talsins sem Karl-Werner afhendir á fimmtudaginn, en þau eru jafnframt þau elstu í safninu frá 1535-1597.
UMMÆLI