KLAK – Icelandic Startups stendur árlega fyrir stærstu frumkvöðlakeppni Íslands, Gulleggið, sem hefur það að markmiði að skapa vettvang fyrir öll til að koma nýsköpunarhugmyndum sínum á framfæri. KLAK heldur norður á Akureyri þann 17. nóvember næstkomandi þar sem Háskólinn á Akureyri í samstarfi við KLAK mun kynna Gulleggið í Menningarhúsinu Hofi. Þar verða nokkrir bakhjarlar Gulleggsins með kynningarbása en tónlistarmaðurinn HÚGÓ mun skemmta fólki.
Pelliscol, sproti Írisar Bjarkar Marteinsdóttur og Ívars Arnar Marteinssonar frá Sauðárkróki komst í topp 10 í keppninni á síðasta ári og Íris og Ívar hlutu viðurkenninguna vinsælasta Gulleggsteymið. Markmið Pelliscol var að þróa hágæða náttúrulegar Spa húðvörur úr hreinu íslensku kollageni fyrir baðlón, heilsulindir og hótel.
Magnús Daði Eyjólfsson, verkefnastjóri Gulleggsins er spenntur fyrir komunni til Akureyrar í ár.
„Vísindaferðir Gulleggsins eru haldnar í samstarfi við háskólana og hafa það að markmiði að kynna Gulleggið fyrir háskólanemum. 17. nóvember næstkomandi verður kynning á frumkvöðlakeppninni í Menningarhúsinu Hof í samstarfi við Háskólan á Akureyri. Við búumst við að nemendur og aðrir gestir flykkist í Hof en vísindaferðin í fyrra var vel sótt,“ segir Magnús Daði.
Mynd: Íris Björk Marteinsdóttir og Ívar Örn Marteinsson hjá PellisCol
UMMÆLI