Tónleikaveisla verður í Hofi þann 12. apríl næstkomandi þegar hljómsveitin ÞAU flytur þar nýja og spennandi tónlist við ljóð norðlenskra og vestfirskra skálda.
Hljómsveitina skipa Rakel Björk Björnsdóttir og Garðar Borgþórsson. Rakel hefur getið sér gott orð sem leik- og söngkona, m.a. í Borgarleikhúsinu þar sem hún lék í sýningunum 9 líf, Matthildur og Room 4.1. Garðar er gítar- og slagverksleikari sem hefur leikið með hljómsveitum á borð við Ourlives og different Turns, auk þess að semja tónlist fyrir fjölda leiksýninga.
ÞAU munu flytja frumsamin lög þar sem ljóð skálda frá Norðurlandi lifna við. Orðsnilld Davíðs Stefánssonar frá Fagraskógi, Huldu, Ólafar frá Hlöðum, Önnu Ágústsdóttur og fleiri skálda öðlast nýtt líf í vönduðum tónlistarflutningi með rokk, popp, djass og blús ívafi.
Ef lesendur kannast ekki við ÞAU geta þeir skoðað nýtt lag þeirra við ljóð Davíðs Stefánssonar Abba-labba-lá með því að smella hér. Lesendur geta svo nálgast miða á tónleikana í Hofi á heimasíðu Menningarfélags Akureyrar eða með því að smella hér.
UMMÆLI