Þann 1. október lauk alþjóða hjólakeppninni sem öldrunarheimilið Hlíð hefur tekið þátt í af krafti síðustu vikur. Það voru yfir 200 lið sem tóku þátt í keppninni í ár og um 5000 þátttakendur frá 11 löndum.
Í liði Hlíðar voru rúmlega 60 þátttakendur og voru alls hjólaðir 11.945 km. Það var lið frá Kanada sem sigraði og hjólaði rúmlega 14.000 km en lið frá Noregi var í 3. sæti með um 8.700 km hjólaða.
,,Mikil liðsheild og keppnis gleði var hjá keppendum, lögðu allir sitt að mörkum og skilaði það þessum frábæra árangri. Þetta var í 4. skiptið sem Hlíð tekur þátt og besti árangurinn hingað til,“ segir í tilkynningu frá Hlíð.
97 ára gömul og með þeim spretthörðustu í keppninni
Lið Hlíðar var sérlega sterkt í ár og margir sem hjóluðu langt. Þá voru nokkrir keppendur sem náðu inn á topp 30 listann yfir þá sem hjóluðu lengst í keppninni, 5 karlar og 5 konur en þau hjóluðu öll yfir 400 km, segir í tilkynningunni um þennan frábæra árangur liðsins.
Torfi Leósson var sá sem hjólaði lengst í liðinu eða 1.200 km, Snjólaug Jóhannsdóttir næst lengst eða 1.080 km og Aðalheiður Einarsdóttir þriðja lengst, 965 km. Þess má geta að Aðalheiður er 97 ára gömul og er með þeim spretthörðustu í keppninni.
Nánar um málið inn á heimasíðu Hlíðar hér.
UMMÆLI