Fjórir einstaklingar úrskurðaðir í gæsluvarðhald vegna líkamsárásar og frelsissviptingar

Eins og Kaffið greindi frá í gær átti sér stað umfangsmikil lögregluaðgerð í íbúðarhúsi við Strandgötu í gær. Lögreglan handtók fimm einstaklinga í gær vegna gruns um alvarlega líkamsárás og frelsissviptingu á rúmlega þrítugum karlmanni. Í nótt var sjötti einstaklingurinn handtekinn samkvæmt tilkynningu frá lögreglunni á Norðurlandi eystra.

,,Fjórir einstaklingar voru í dag úrskurðaðir í gæsluvarðhald af Héraðsdómi Norðurlands eystra að kröfu Lögreglustjórans á Norðurlandi eystra. Var þeim gert að sæta gæsluvarðhaldi allt til laugardagsins 17. febrúar kl. 15:00. Þá var þeim gert að sæta einangrun á meðan rannsóknarhagsmunir standa til þess. Tveir þeirra lýstu því yfir að þeir hyggðust kæra úrskurðinn til Landsréttar í því skyni að fá hann felldan úr gildi.

Yfirheyrslur í dag yfir tveimur sakborningum, af þeim sex sem handteknir hafa verið vegna málsins, hafa nú leitt til þess að þeim tveimur hefur nú verið sleppt úr haldi.