Dóra Ólafsdóttir, sem varð elst allra Íslendinga, er látin. Hún lést á hjúkrunarheimilinu Skjóli í Reykjavík í gærmorgun, 109 ára gömul. Frá andláti Dóru er greint á vef Morgunblaðsins.
„Dóra fæddist í Sigtúnum á Kljáströnd í Grýtubakkahreppi í Suður-Þingeyjarsýslu 6. júlí 1912. Foreldrar hennar voru Ólafur Gunnarsson útgerðarmaður og Anna María Vigfúsdóttir húsfreyja. Að loknu gagnfræðaprófi frá Gagnfræðaskólanum á Akureyri, síðar MA, fór Dóra til Kaupmannahafnar. Eftir það var hún talsímavörður hjá Landsímanum á Akureyri í rúm 40 ár, á árunum 1936 til 1978. Hún bjó lengst af í Norðurgötu 53 þar í bæ. Dóra var orðin 100 ára þegar hún hætti að sjá um sig sjálf í Norðurgötunni og fluttist í hjúkrunarheimilið Skjól í Reykjavík. Eiginmaður Dóru var Þórir Áskelsson, sjómaður og seglasaumari. Hann lést árið 2000. Sonur Dóru og Þóris er Áskell blaðamaður og dóttir Dóru er Ása Drexler sem búsett er í Bandaríkjunum,“ segir um Dóru í umfjöllun Morgunblaðsins.
Dóra varð 109 ára og 160 daga gömul þann 13. desember síðastliðinn, og sló þar með Íslandsmet í langlífi, en fyrra met átti Jensína Andrésdóttir sem varð 109 ára og 159 daga.
UMMÆLI