Myndlistarkonan Björk Viggósdóttir opnaði nýverið sýningu í Listasafninu á Akureyri þar sem hún býður gestum upp á einstaka upplifun þar sem myndlist og hljóð renna saman í einn heildrænan skynheim. Á undanförnum árum hefur Björk sýnt verk sín víða annars staðar um Evrópu, í Bandaríkjunum og í Asíu.
Í verkum sínum vinnur Björk með sjónrænan heim tilfinninga, hljóða og skynjunar og leggur sérstaka áherslu á að virkja öll skilningarvit áhorfenda. Hún hefur unnið mikið í samstarfi við önnur tónskáld, tónlistarfólk, dansara og aðra listamenn, bæði á einkasýningum og samsýningum.
Eitt af sérkennum Bjarkar er hvernig hljóð og mynd fléttast saman. Hún semur sjálf „hljóðlandslög“ fyrir innsetningarnar og í sumum tilfellum lifa hljóðverkin sjálfstæðu lífi og þróast í það sem listakonan kallar „sjónræna tónlist “, þar sem hljóðið stendur eitt og sér án sjónrænna þátta.
Hljóðheimur Bjarkar er fjölbreyttur og byggir á rafrænni vinnslu sem blandar saman upptökum af lifandi hljóðfærum, röddinni hennar, hljóðum úr náttúrunni og öðrum hversdagslegum hlutum. Samhljómur þessara þátta er lykillinn að heildarupplifuninni.
Björk lætur sjaldan sjá sig á tónleikasviðinu þannig hver framkoma hennar er viðburður út af fyrir sig. Í kvöld stígur hún á svið í Innri salnum á Leyni í Hafnarstræti 95 á Akureyri þar sem hún mun töfra fram sinn einkennandi hljóðheim. Tónleikarnir hefjast klukkan 20.00 og aðgangur er ókeypis.
