Í lok júní var karlmaður dæmdur í tveggja ára fangelsi í héraðsdómi Norðurlands eystra fyrir kynferðisbrot gegn stjúpdóttur sinni. Brotin áttu sér stað á árunum 2010 til 2014 eða frá því að stúlkan var eins árs þar til hún varð fjögurra ára gömul.
Maðurinn gaf sig sjálfur fram við lögreglu og viðurkenndi brot sín. Það mildaði dóminn töluvert en einnig var tekið tillit til þess að maðurinn hafði hreinan sakarferil og þess að hann iðraðist mjög verknaðarins.
Við ákvörðun refsingar var einnig litið til þess að um væri að ræða mjög alvarleg brot gegn ungu barni sem ákærða var trúað fyrir og hafði fjölskyldutengsl við. Manninum er gefið að sök að hafa ítrekað brotið kynferðislega á barninu.
Í dóminum kemur fram að maðurinn hafi sleikt kynfæri barnsins og hafi látið það í eitt til tvö skipti strjúka getnaðarlim sinn og snerta með munninum.
Mál mannsins var rannsakað árið 2014 þegar grunur vaknaði um að hann hefði framið kynferðisbrot en sakargögn þóttu ekki nægileg til ákæru. Maðurinn mætti sjálfur á lögreglustöðina 24. maí á síðasta ári og viðurkenndi brot sín.
Maðurinn var dæmdur í tveggja ára fangelsi en mun einungis þurfa að sitja inni í þrjá mánuði af tímanum þar sem 21 mánuður er skilorðsbundinn. Hann var einnig dæmdur til þess að greiða brotaþola 2 milljónir í miskabætur en af hálfu brotaþola var þess krafist að ákærði greiddi fjórar milljónir króna.
UMMÆLI