Efstu átta liðin fara í úrslitakeppnina.
Mjölnismenn, stuðningsmannafélag Þórs, eru stórhuga fyrir leik liðsins gegn Njarðvík í Dominos-deild karla í körfubolta sem fram fer í Íþróttahöll Akureyrar á morgun, föstudag, klukkan 20.
Leikurinn er afar mikilvægur fyrir Þórsara sem eru í harðri baráttu við Njarðvíkinga og fleiri lið um sæti í úrslitakeppninni en Þór og Njarðvík eru jöfn að stigum þegar þremur umferðum er ólokið.
Mjölnismenn hafa gjörbylt stemningunni á áhorfendapöllunum að undanförnu og var ákveðnum hápunkti náð þegar Þórsliðið bar sigurorð af stjörnum prýddu liði KR í síðasta heimaleik.
Síðan þá hafa tveir útileikir í röð tapast og þurfa Þórsarar því nauðsynlega á sigri að halda á morgun.
,,Við viljum að sjálfsögðu fá alla í Höllina, alla í rauðu og fólk má endilega vera óhrætt við að sitja nær okkur og taka undir!“ segir Aron Elvar Finnsson, Mjölnismaður.
-Svona var stemningin eftir síðasta heimaleik
Sjá einnig
UMMÆLI