Birkir Heimisson er fyrirliði U17 ára landsliðs Íslands
Fótboltinn rúllaði víða um Evrópu í kvöld og voru þrír Akureyringar á fleygiferð en allir voru þeir í tapliði í þetta skiptið.
Birkir Bjarnason lék allan leikinn fyrir Basel þegar liðið tapaði fyrir franska stórveldinu PSG í Sviss í A-riðli Meistaradeildar Evrópu. Blaise Matuidi kom gestunum yfir en Luca Zuffi jafnaði fyrir Birki og félaga. Belgíski bakvörðurinn Thomas Meunier tryggði svo PSG sigurinn með stórkostlegu marki á síðustu mínútu venjulegs leiktíma.
Þá voru tveir Akureyringar í byrjunarliði U17 ára landsliðs karla sem mætti Ísraelum ytra. Birkir Heimisson lék allan leikinn á miðjunni og bar fyrirliðaband Íslands. Ágúst Eðvald Hlynsson lék einnig allan leikinn í stöðu sóknartengiliðs og nældi sér í gult spjald eftir rúmlega klukkutíma leik en lokatölur urðu 2-0 fyrir heimamönnum í Ísrael.
Þetta var fyrsti leikur liðanna í undankeppni EM en næsti leikur strákanna er gegn Pólverjum næstkomandi fimmtudag.
UMMÆLI