Fjárhagsáætlun Akureyrarbæjar fyrir árin 2025-2028 var samþykkt í bæjarstjórn í gær, þriðjudaginn 3. desember. Rekstrarniðurstaða samstæðunnar árið 2025 er áætluð jákvæð um tæplega 1,5 milljarð króna. Gert er ráð fyrir stighækkandi rekstrarafgangi á árunum 2026-2028 og að niðurstaðan árið 2028 verði tæplega 2,1 milljarður. Eignir eru áætlaðar samtals 73,7 milljarðar króna í árslok. Þetta kemur fram á heimasíðu Akureyrarbæjar.
Ásthildur Sturludóttir bæjarstjóri segist þar vera ánægð með áætlunina: „Við erum stolt af þeirri vinnu sem hefur farið fram við gerð hennar. Þetta er vel unnin og skýr fjárhagsætlun sem sýnir glögglega fram á traustan fjárhag bæjarins. Þannig að við horfum björtum augum til framtíðar.“
Nánar er farið yfir úthlutun fjármagns í tilkynningu Akureyrarbæjar sem hægt er að lesa með því að smella hér. Fjárhagsáætlunina sjálfa er hægt að skoða með því að smella hér.
