Vel var tekið í söfnunarátak UNICEF á Íslandi og Te & Kaffi sem lauk í lok október. Alls söfnuðust 11.363 lítrar af næringarmjólk fyrir rúmar 2,5 milljónir sem UNICEF nýtir til að meðhöndla börn sem eru lífshættulega veik vegna vannæringar. Í söfnunarátakinu gaf Te & Kaffi andvirði 300 millilítra af næringarmjólk með hverjum seldum bolla á kaffihúsunum og viðskiptavinum var boðið að gera það sama með því að bæta 66 krónum við bollann.
Hlutfallslega flestir skammtar af næringarmjólk voru keyptir á kaffihúsi Te & Kaffi í Aðalstræti og mætti starfsfólk á skrifstofu UNICEF á Íslandi til þess að fræðast um hvernig næringarmjólkin nýtist börnum í neyð.
„Mér finnst ótrúlega gott að vita að ég og mitt teymi höfum gert eitthvað til að bæta stöðu barna í heiminum. Stundum líður manni svo máttvana í baráttunni við vandamál eins risastór og hungrið í heiminum, en nú höfum við öll hjálpast að við að gera eitthvað sem skiptir raunverulegu máli,“ segir Krista Björk Kristjánsdóttir, verslunarstjóri Te & Kaffi, Aðalstræti. „Það var líka svo frábært að sjá viðbrögð fastakúnnanna. Þau koma á hverjum degi, sum oftar en einu sinni, og í hvert skipti sem við spurðum hvort þau vildu styðja verkefnið þá var svarið yfirleitt „Já auðvitað, er UNICEF dagur í dag!“ bætir hún við.
Næringarmjólk bjargar lífum vannærðra barna
Te & Kaffi hefur verið ómetanlegur stuðningsaðili UNICEF á Íslandi frá árinu 2008 og safnað yfir 40 milljónum króna fyrir börn í neyð. Stuðningurinn hefur meðal annars nýst í að tryggja börnum í Kólumbíu menntun, bregðast við ebólufaraldrinum í Vestur-Afríku og bólusetja börn gegn mænusótt.
Þar sem hungur og matvælaskortur ógnar lífi barna víða var ákveðið að fara í sérstakt söfnunarátak til að bregðast við vannæringu meðal ungra barna. Jemen stendur nú á barmi hungursneyðar og í Afríku sunnan Sahara eru 5 milljónir barna í hættu vegna vannæringar.
UNICEF nýtir næringarmjólkina á sérstökum næringarmiðstöðvum til að meðhöndla börn sem eru orðin of veikburða til að innbyrgða fasta fæðu. Næringarmjólkin er orkurík og full afnauðsynlegum kolvetnum og fitu, auk þeirra vítamína og steinefna sem börn þurfa til að vaxa og dafna. Hún var sérstaklega þróuð til að meðhöndla allra veikustu börnin á næringarmiðstöðvum og sjúkrahúsum.
Ólafur Darri og Sigríður Thorlacius heimsóttu næringarmiðstöðvar
Vannæring getur hljómað eins og óyfirstíganlegt vandamál en með réttri meðhöndlun í tæka tíð ná langflest börn sér á einungis nokkrum vikum. UNICEF einsetur sér að veita börnum sem þjást af alvarlegri vannæringu viðeigandi meðferð, meðal annars með næringarmjólk og öðrum bætiefnum. Stuðningurinn er því mikilvægur og hefur raunveruleg áhrif á líf barna.
Í myndböndunum hér að neðan, sem tekin voru upp í Madagaskar og Bangladess, er hægt að sjá hvernig næringarmjólk er notuð til að bjarga lífi barna, en Ólafur Darri leikari og Sigríður Thorlacius söngkona, hafa bæði heimsótt næringarmiðstöðvar á vegum UNICEF. Sjáðu myndböndin hér að neðan:
Söfnunarátakinu í kaffihúsum Te & Kaffi er nú lokið en alltaf er hægt að gefa næringarmjólk í gegnum vefverslun UNICEF á Íslandi hér.
UMMÆLI