Slökkt var á síma Birnu af mannavöldum

Birna Brjáns­dótt­ir

Lögregla telur að slökkt hafi verið á síma Birnu Brjánsdóttur af mannavöldum. Hann hafi ekki orðið batteríslaus eins og talið var í fyrstu. Sími Birnu tengdist símamastrinu á gömlu slökkvistöðinni í Hafnarfirði klukkan 05:50 aðfaranótt laugardags en frá því ekki verið kveikt á símanum.

Síminn hefur ekki fundist en ef kveikt verður á honum aftur fær lögreglan strax upplýsingar um það. Síminn var af gerðinni Iphone en GPS-tækni sem gæti staðsett símann var ekki virk.

Þetta kom fram á blaðamannafundi lögreglunnar á höfuðborgarsvæðinu sem lauk nú rétt í þessu. Á fundinum kom fram að þrátt fyrir að fjölmargar vísbendingar um ferðir Birnu hafi borist hafi engin þeirra gefið haldbærar skýringar á hvarfi Birnu.

Lögreglan biður alla þá sem veitt geta upplýsingar um ferðir Birnu og hvar hún er niðurkomin að hafa samband við lögreglu í síma 444 1109.