Knattspyrnukonan Sandra María Jessen var besti leikmaður Bestu deildarinnar í fótbolta í apríl og maí samkvæmt einkunnargjöf Morgunblaðsins. Sandra hefur verið mögnuð í liði Þór/KA í upphafi tímabilsins og hefur þegar skorað tíu mörk eftir fyrstu sex leikina.
Í stigagjöf Morgunblaðsins eru gefin M til að dæma frammistöður í leikjum. Sandra hefur fengið M í öllum sex leikjum Þórs/KA og einu sinni fékk hún hæstu einkunnina, þrjú M, fyrir frammistöðu sína gegn FH í annarri umferð. Hún er eini leikmaður deildarinnar sem hefur fengið þrjú M í leik á þessu tímabili. Samtals hefur hún fengið átta M úr fyrstu sex leikjunum.
Þór/KA hefur byrjað Íslandsmótið einstaklega vel en eftir tap í fyrsta leik gegn Val hefur liðið unnið síðustu fimm leiki sína og er komið í annað sæti deildarinnar.
Nánar er fjallað um stöðuna í einkunnagjöf Morgunblaðsins í blaðinu í dag og þar er birt úrvalslið Morgunblaðsins fyrir apríl og maí.
UMMÆLI