Ljóðskaldið Margrét Jónsdóttir lofaði fallega landið okkkar í alkunnu kvæði sínu „Ísland er land þitt.“ Í kvæðinu telur hún upp suma af helstu kostum Íslands: Vornóttina björtu, grænu sumrin og bjartsýni íslensku þjóðarinnar. Það var þó sjötta lína kvæðisins sem kom fréttaritara til hugar á kvöldrúnti gærkvöldsins: „Ísland með blikandi norðljósa traf.“
Í gærkvöldi átti sér stað ein besta norðurljósasýning ársins í Eyjafirði og í raun á landinu öllu. Stór sólarstormur átti sér stað sem leyddi til þess að norðurljós sáust víða í Evrópu í gær, en að sjálfsögðu var sjónarspilið öllu magnaðra hér á norðurhveli jarðar. Þar að auki var fullkomlega heiðskýrt yfir Eyjafirði í nótt, svo ský spilltu hvergi fyrir útsýni.
Fréttaritari er sjálfur vanur að kíkja út á rúntinn þegar norðurljósaspá er góð (sjá leiðbeiningar hér) og rekst þá á aðra áhugamenn um ljósin, en sjaldan hefur hann hitt á eins marga og hann gerði í gærkvöldi. Bæði Akureyringar og ferðamenn flykktust út úr bænum til að fylgjast með sýningunni. Bílastæðið á Gásum, sem er vinsæll staður til að fylgjast með ljósunum, var smekkfullt af bílum. Myndirnar sem fylgja fréttinni eru allar teknar af fréttaritara í Eyjafirði í gærkvöldi.
Þeir sem eru súrir yfir því að hafa misst af sýningu gærkvöldsins þurfa þó ekki að örvænta strax, því norðurljósaspá fyrir kvöldið í kvöld lofar enn góðu.
UMMÆLI