Jón Þór Sigurðarson skrifar
Ríkisstjórnin vill að við kjósum um aðildarviðræður að Evrópusambandinu í þjóðartkvæðagreiðslu. Deilt er um orðalag spurningarinnar sem til stendur að bera fram. Ég ætla að sinni að leiða þær deilur hjá mér. Stóra málið í mínum huga er að kjósendur geri sér grein fyrir því um hve afdrifaríka ákvörðun er að ræða.
Dæmin hræða
Það er ekki neitt smámál að ætla Íslandi að ganga inn í fiskveiðistjórnarkerfi Evrópusambandsins. Því svo mikið er víst að enda þótt samið verði um fresti og tilslakanir þá yrðu þær tímabundnar og háðar vilja ráðandi afla í Evrópusambandinu því reynslan sýnir að þau öfl standa fast á því að afsala sér aldrei yfirráðum sínum. Þessu hafa Írar nú fengið að kynnast en í kjölfar inngöngu þeirra í ESB árið 1973 gerðu þeir samning við sambandið um það að á þrengingartímum skyldu þeir eiga tilkall til veiða um umfram það sem hefði tíðkast eftir inngöngu í þáverandi Efnahagsbandalag Evrópu. Undir lok síðasta árs vildu þeir virkja þennan samning. Þeim var nánast sagt að gæða sér á því sem úti frýs svo það sé pent orðað!
Hagsmunastefna ESB
Evrópusambandið fer nefnilega sínu fram eins og vindar blása hverju sinni og þykir þjóna pólitískum hagsmunum sambandsins þá stundina. Það er eins og það sé mörgum gleymt að fyrir örfáum mánuðum setti Brussel tolla á járnblendi frá Noregi og Íslandi þvert á EES samninginn. Það þótti henta þann daginn. Í fyrstu brást Þorgerður Katrín Gunnarsdóttir utanríkisráðherra hin versta við og sagði að þetta myndi hafa afleiðingar. Svo varð þó ekki eftir því sem best er vitað enda málið gleymt í opinberri umræðu áður en vikan var úti. Fyrr á þessu ári sagði hún síðan tollana ásættanlega!
Tímabundnar tilslakanir eru einmitt tímabundnar!
Menn skulu því ekki ímynda sér að tímabundnar tilslakanir haldi út í hið óendanlega. Einmitt þess vegna þarf að ræða það af mikilli alvöru hvað það þýðir að ganga inn í fiskveiðikerfi ESB því sú umræða snýst um mikilvægustu auðlind Íslendinga, sjálfa sjávarauðlindina. Kjósendur verða að fá sem gleggstar upplýsingar um þetta málefni svo þeir séu í stakk búnir til þess að mynda sér upplýsta skoðun. Það er einmitt þetta sem vakir fyrir samtökunum Til vinstri við ESB með því að efna til almenns opins fundar um ESB og sjávarútvegsmálin á Hótel KEA á Akureyri klukkan 14 laugardaginn 25. apríl næstkomandi.
Þekking á reglum og hefum
Á meðal frummælenda verður Hjörtur J. Guðmundsson, alþjóðastjórnmálafræðingur, en hann hefur rannsakað löggjöf og dómahefð Evrópusambandsins um árabil, hefur skrifað mikið og af meiri þekkingu um þessi mál en flestir menn aðrir og verður fróðlegt að heyra hvað hann hefur til málanna að leggja. Það á einnig við um Mikael Snæ Gíslason, B.Sc í líftækni sem flytur framsögu sem og gerir undirritaður, en fundarstjóri verður Jana Salóme Ingibjargar Jósepsdóttir.
Mikilvægi umræðunnar
Umræður verða vonandi líflegar að loknum framsögum. Mikilvægi þessa fundar og vonandi sem flestra ámóta funda er að fá fræðslu og svo einnig umræðu um hverju við stæðum frammi fyrir væri ákveðið að innlima Ísland í Evrópusambandið. Það væri að mínum dómi hörmuleg niðurstaða sem þjóðin ber vonandi gæfu til að hafna.
Jón Þór Sigurðarson, fyrrverandi sjómaður og félagi í Til vinstri við ESB
