Fasteignamarkaðurinn á Akureyri hefur rokið upp á síðkastið. Í október hafði fasteignaverð á Akureyri hækkað um 21% milli ára, sem er mesta hækkun á ársgrundvelli frá því um 2006. Á sama tíma á höfuðborgasvæðinu hefur fasteignarverð hækkað um 17% Þetta kemur fram í mánaðarskýrslu Íbúðalánasjóðs.
„Að undanförnu hefur íbúum Akureyrar fjölgað jafnt og þétt. Í byrjun október bjuggu 18.710 manns á Akureyri og hafði íbúum sveitarfélagsins fjölgað um 220 á fyrstu 9 mánuðum ársins. Til samanburðar fjölgaði íbúum um 140 á sama tíma 2016. Búast má við því að fjölgun íbúa á svæðinu hafi ýtt undir aukna eftirspurn eftir húsnæði sem skýrir að einhverju leyti verðhækkunina á svæðinu,“ segir í skýrslunni.
Að jafnaði kemur megindrifkrafturinn í hækkun fasteignaverðs til af hefðbundnum áhrifaþáttum eins og þróun kaupmáttar, tekna og atvinnustigs. Allir þessir þættir stefna nú í þá átt að ýta undir hækkun fasteignaverðs. Þessu til viðbótar er nokkuð ljóst að verulega vantar á að framboð íbúða anni eftirspurn og greinilega er þörf á nýjum íbúðum inn á markaðinn til þess að hægt sé að anna eftirspurn. Flestir undirliggjandi þættir vísa því í áframhaldandi hækkun fasteignaverðs.
UMMÆLI