Fyrir nokkru var leikskólinn gerður upp og stækkaður, meðal annars til þess að geta veitt dagvistun frá þeim tíma er fæðingarorlofi lýkur
Byggðaráð Dalvíkurbyggðar fundaði í gær og og tekið var fyrir málefni frá tveimur hjónum þar sem fjallað var um skort á leikskólaplássi í sveitarfélginu. Foreldrar í Dalvíkurbyggð sjá ekki fram á að fá pláss á leikskóla fyrir börnin sín fyrr en næsta haust. Eins og er eru engin dagforeldri í sveitarfélaginu, en hingað til hafi ekki þótt markaður fyrir slíka starfsemi og veldur þetta miklum áhyggjum hjá bæjarbúum.
„Ég fer þá bara í launalaust leyfi þangað til í ágúst-september. Það er bara kvíðahnútur í magann, við erum fimm í fjölskyldunni sem þarf að framfleyta þannig það munar um það ef annað foreldrið missir launin,“ segir Júlíana Kristjánsdóttir íbúi á Dalvík en hún ætlaði að byrja að vinna í mars þegar dóttir hennar væri orðin árs gömul.
Samkvæmt reglum leikskólans eru börn, tveggja ára og eldri, í forgangi, en reynt er að taka inn yngri börn ef kostur er, en Hlynur Sigursveinsson, sviðsstjóri fræðslu- og menningarsviðs Dalvíkurbyggðar, segir að stefna bæjaryfirvalda sé að börn komist inn á leikskóla um níu mánaða aldur.
Nýlega var leikskólinn stækkaður og gerður upp til þess að geta veitt aðgang að dagvistun en erfitt hefur verið að halda í þá áætlun vegna manneklu. „Við erum búin að auglýsa og erum að tala við umsækjendur. Síðan verður staðan tekin í framhaldinu, hvort við þurfum að auglýsa aftur eða hvort við getum leyst þörfina sem er til staðar, það er verið að vinna að lausn málsins og sú vinna er alveg á fullu,“ segir Hlynur.
UMMÆLI