Ákvörðun um Goðamót 6. flokks karla í fótbolta sem fram á að fara á Akureyri um næstu helgi verður tekin síðar í dag. Á heimasíðu Þórs segir að í sannleika sagt líti ekki vel út með mótahald um næstu helgi vegna Covid-19 veirunnar.
Þar segir enn fremur að aðstandendur mótsins vilji taka yfirvegaða ákvörðun og að það verði leitað ráða hjá yfirvöldum heilbrigðismála um þeirra afstöðu varðandi fjöldasamkomur af þessu tagi á þessum tímapunkti.
„Einnig viljum við hvetja þjálfara liðanna til að athuga afstöðu fólks í sínum foreldrahópum. Augljóslega verður mótinu frestað óháð öðrum sjónarmiðum ef þátttakan minnkar verulega,“ segir á vef Þórs
Einnig verður teking ákvörðun síðar um Goðamót 5. flokks kvenna sem á að fara fram helgina 20.-22. mars. Ákvörðun um það mót verður tekin með sama fyrirvara og um er að ræða með 6. flokk karla nú, það er mánudaginn 16. mars.
Einungis yrði um frestanir á mótunum að ræða, en ekki aflýsingu. Mótin munu fara fram þó síðar verði. Þá er horft til loka apríl eða fram í miðjan maí með líklegar tímasetningar.
