Föstudaginn 25. janúar sendi Stefán Elí frá sér splunkunýjan ópus sem ber heitið ‘Hoping That You’re Lonely’. Lagið samdi Stefán í samvinnu við RÁN (Rán Ringsted) sem ljáir laginu einnig sína prúðu rödd. Í upphafi vetrar tjáði Stefán okkur að hann stefndi á að gefa út eitt lag í mánuði og þetta er fjórða lag þess verkefnis. Verkefnið nefnir hann ‘break my heart so i know’.
‘Hoping That You’re Lonely’ varð til við ferðir Stefáns í Ameríku þar sem hann tók upp grunnhugmyndina að laginu.
“Ég hafði verið að fikta í hljóðgervli að skapa sánd og til mín kom hljómagangurinn. Í koll minn skaust svo aðal laglínuhugmyndin sem má heyra í ýmsum myndum út lagið. Mér reyndist ómögulegt að losna við laglínuna af heilanum og þá grunaði mig að í höndum mér lægi eitthvað sérstakt”
Stefán kom svo til Íslands á ný og hugsaði sér hve fallegt það yrði ef vinkona hans, Rán Ringsted, myndi einnig syngja lagið.
“Ég heyrði strax í Rán þegar ég áttaði mig á því hversu vel rödd hennar myndi passa við lagið. Ég sendi henni hugmyndina og spurði hvort hún væri ekki bara til í að hittast næsta dag til að semja og taka upp (ég á það til að vera heldur snar í snúningum 😉 ). Lukkulega sagðist hún fíla lagið mjög og næsta dag hittumst við, ásamt Birki Blæ, og sömdum það sem vantaði upp á textann. Strax á eftir tókum við upp sönginn hennar og ég varð yfir mig spenntur. Hún syngur svo yndislega að þegar ég hlustaði á upptökurnar þá vissi ég að lagið væri komið á annað þrep.”
Þetta er í fyrsta sinn sem rödd Ránar ómar um hallir Spotify en vonandi mun heyrast meira frá henni mjög bráðlega. Stefán Elí stefnir á að halda áfram við útgáfur sínar og hann hefur einnig gerst heldur iðinn við spilamennsku.
Hægt er að hlýða á nýja lagið á öllum helstu tónlistarveitum
UMMÆLI