Bæjarráð Akureyrarbæjar hafnar aðdróttunum þess efnis að annarleg sjónarmið hafi ráðið för við sölu á eignarhlut bæjarins í Tækifæri hf. Bæjarráð samþykkti bókun, á fundi sínum í dag, 13. október 2016, vegna umræðu um söluna á hlut bæjarins.
Eins og Kaffið greindi frá á dögunum ákvað bæjarráð á fundi sínum þann 21. janúar 2016 að ganga að kauptilboði KEA í eignarhlut bæjarins í Tækifæri hf. Tilboðið var upp á 116 milljónir króna en eignarhlutur bæjarins í fyrirtækinu var bókaður á 86,9 m.kr. í ársreikningi Akureyrarbæjar fyrir árið 2014. Lengi hefur verið vilji til að skoða sölu á hlut bæjarins í félaginu með það að markmiði að nýta betur þá fjármuni, sem bundnir hafa verið í félaginu, í aðrar fjárfestingar. Í því sambandi hefur m.a. verið horft til frumkvöðlaseturs í eigu bæjarins.
Í bókuninni segir að bæjarráð viðurkenni að það hafi verið mistök að fara ekki með hlutabréfin í Tækifæri hf. í opið söluferli. KEA hefði alltaf á grundvelli forkaupsréttar getað gengið inn í hæsta tilboð eða gert opinbert tilboð í bréfin. Hvort opið söluferli hefði leitt til þess að hærra verð hefði fengist fyrir bréfin er óvíst, en ferlið hefði þá verið gagnsætt alla leið sem er mikilvægt.
UMMÆLI