Útvarp Akureyri sendir út fréttir frá RÚV

Útvarpsmaðurinn Axel Axelsson er maðurinn á bakvið stöðina.

Útvarp Akureyri FM 98,7 mun á næstunni auka þjónustu við hlustendur sína og senda úr fréttir frá fréttastofu Ríkisútvarpsins. Fréttirnar verða sendar út á heila tímanum, alla virka daga til að byrja með og eru sömu fréttir og birtast á Rás 1, Rás 2 og í Sjónvarpinu.

Útvarp Akureyri FM 98,7 hóf starfsemi 1. desember síðastliðinn en stöðin er eina staðbundna útvarpsstöðin á Eyjafjarðarsvæðinu sem er næst stærsti markaður landsins.  Útvarp Akureyri FM 98,7 leggur sig fram við að vera sönn, staðbundin eða „local“ útvarpsstöð. Það gerir hún með því að þjónusta nærumhverfi en umfjöllun um mannlíf, menningu og viðskipti á Norðurlandi eystra er hjarta stöðvarinnar.

Útvarp Akureyri er á tíðninni FM 98,7 og ennfremur er netstraumur sem nálgast má á heimasíðu stöðvarinnar. Þá er stöðin á Tunein og innan skamms á Sjónvarpi Símans.