Sjúkrahúsið á Akureyri hefur birt starfsemistölur fyrir árið 2024 á vef sínum. Þar kemur meðal annars fram að 405 börn fæddust á Sjúkrahúsinu á árinu. Það eru 5 færri fæðingar en árið 2023 þegar 410 börn fæddust á Sjúkrahúsinu. Hér að neðan má sjá helstu starfstemistölur SAk árið 2024 af vefnum sak.is.
- Fjöldi dvalardaga á árinu voru 26.607 sem er um 11% fækkun frá því í fyrra en að sama skapi er fækkun sjúklinga sem þurfa að leggjast inn um 9%. Meðalfjöldi dvalardaga allra deilda eru 4,5 dagar þannig að sjúklingar liggja mun styttra inni en áður. Mikil aukning hefur verið í fjölda einangranatilfella undanfarna mánuði sem hefur áhrif á hjúkrunarþyngd þar sem fjöldinn einn og sér lýsir ekki álagi á deild.
- Flestir sjúklinganna eru lagðir inn í bráðainnlögn en þær eru um75,1% af heildarinnlögnum.
- Að meðaltali eru níu sjúklingar inniliggjandi á hverjum tíma sem eru með gilt færni- og heilsumat eða slíkt í vinnslu.
- Á árinu 2024 er rúmanýting á lyflækningadeild 89% og er nýtingin 81% á skurðlækningadeild.
- Rúmlega 10.500 einstaklingar hafa fengið þjónustu á göngudeild og þar af 2.246 vegna krabbameinslyfjagjafar, sem er sambærilegt og í fyrra. Komur á dagdeildir voru 6.565.
- Á bráðamóttöku og göngudeild bráðamóttöku er fjöldi samskipta sambærilegur og í fyrra eða 17.566 samanborið við 17.884 á sama tíma í fyrra (sjá súlurit um komur á bráðamóttöku ár hvert). Biðtími eftir því að hitta lækni á bráðamóttöku er nú um 45 mínútur en viðmið okkar eru um 40 mínútna bið eftir lækni.
- Fjöldi skurðaðgerða á árinu var 2.439 sem er aðeins minna en í fyrra þegar 2.598 aðgerðir voru gerðar yfir sama tímabil – fjöldinn segir þó ekki allt þar sem eðli og lengd aðgerða hefur mikið að segja. Tæplega 32% aðgerða voru bráðaaðgerðir og voru gerviliðaaðgerðir 318 á móti 330 gerviliðaaðgerðum í fyrra.
- Fjöldi myndgreiningarannsókna (án brjóstamynda) var rúmlega 40.327 og gerir það að meðaltali um 110 rannsóknir á dag sem er sambærilegt og verið hefur.
- Rannsóknir á rannsóknadeild hafa dregist aðeins saman undanfarin ár en fjöldi rannsókna á lífeðlisfræðideild er sambærilegur og verið hefur undanfarin ár eða um 8.720 rannsóknarverk.
- Á árinu hafa fæðst 405 börn samanborið við 410 börn á sama tíma í fyrra.
- Töluverð fækkun er í komum og innlögnum ósjúkratryggðra miðað við sama tímabil í fyrra. Bráðamóttakan hefur sinnt 670 ósjúkratryggðum einstaklingum og 110 hafa verið á legudeildum SAk en í fyrra höfðu verið lagðir inn 125 einstaklingar og um 770 einstaklingar leitað á bráðamóttökuna. Um er að ræða rúmlega 14% fækkun í komum á bráðamóttöku.
Nánari greining á starfsemi sjúkrahússins verður unnin á næstu vikum samhliða ársskýrslu SAk.
UMMÆLI