Endurnýjaður samningur Akureyrarbæjar við starf KFUM og KFUK á Akureyri var undirritaður í lok nóvember.
Í tilkynningu á vef Akureyrarbæjar segir að markmiðið með samningnum sé að gefa fjölbreyttum hópi barna og ungmenna kost á heilbrigðu og metnaðarfullu félags- og æskulýðsstarfi í anda KFUM og KFUK.
„Akureyrarbær leggur áherslu á að starfið standi öllum börnum og ungmennum til boða. Sem barnvænt samfélag byggir Akureyrarbær á fimm grunnþáttum; þekkingu á réttindum barna, því sem er barni fyrir bestu, jafnræði – að horft sé til réttinda allra barna, þátttöku barna í samfélaginu og barnvænni nálgun,“ segir í tilkynningu.
Fyrir framlag Akureyrarbæjar til KFUM og KFUK skal félagið bjóða upp á barna– og unglingastarf á Akureyri ásamt sumarbúðum að Hólavatni. Bjóða skal upp á faglegt starf með forvarnir og jafnrétti að leiðarljósi og sem taka mið af grunnþáttum barnvænna sveitarfélaga. Samningurinn gildir fyrir árin 2024-2026.
UMMÆLI