Esjan hefur fengið algerlega nýja merkingu í hugum okkar og er meiri örlagavaldur en okkur hafði grunað áður. Myndlistarmennirnir Ingibjörg Sigurjónsdóttir og Ragnar Kjartansson gerðu í ár einstök verk sérstaklega fyrir Menningarhús í Sigurhæðum. Verkin eru innan um eða í innsetningum sem miðla menningararfi staðarins og sögu hússins. Eins og kunnugt er létu hjónin Matthías Jochumsson og Guðrún Runólfsdóttir reisa Sigurhæðir árið 1903 og það var bæði heimili þeirra og vinnustaður þar sem þau unnu að listsköpun sinni.
Laugardaginn komandi, 9. nóvember klukkan 13 verður Hlynur Hallsson myndlistarmaður með spjall um Esjuna og sýninguna, þar sem farið verður um Sigurhæðir með áherslu á verk Ingibjargar og Ragnars. Skoðað verður hvernig þau kallast á við menningararfinn og koma inn með ferska vinkla á efnivið staðarins. 150 ár eru frá því að Matthías samdi sálminn sem síðar varð þjóðsöngur okkar og tengsl verka Ingibjargar og Ragnars við hann og örlagaárið 1874 eru skoðuð. Kristín Þóra Kjartansdóttir, staðarhaldari í Sigurhæðum kemur einnig með stutt og áhugaverð sögutengd innskot í samtalið.
Forvitnileg, ljúf, djúp og fyndin hálftíma samræða og gott tækifæri til að koma í þetta dásamlega hús og kynnast einnig framúrskarandi myndlist. Nú fer líka að verða síðasti séns að koma í Flóru menningarhús í Sigurhæðum á þessu ári en síðasti opnunardagur verður 12. nóvember. Fram að því er opið daglega kl. 9-15 eins verið hefur frá 12. maí í vor.
Spjallið fer fram á íslensku, öll eru velkomin og það er enginn aðgangseyrir.
UMMÆLI