Tekur kærustuna með sér til Þór/KA

Sandra Stephany Mayor

Pepsi-deildarliðið Þór/KA hefur náð samningum við mexíkósku knattspyrnukonurnar Söndru Stephany Mayor Gutierrez og Bianca Elissa Sierra Garcia um að leika með liðinu næsta sumar.

Þær stöllur þekkjast mjög vel því þær eru ekki eingöngu samherjar í mexíkóska landsliðinu heldur eru þær kærustupar.

Sandra Stephany Mayor ætti að vera íslenskum knattspyrnuáhugamönnum vel kunn en hún sló í gegn með Þór/KA á síðustu leiktíð, skoraði fimmtán mörk í 21 leik og hjálpaði liðinu að ná 4.sæti Pepsi-deildarinnar.

Bianca Sierra er 24 ára gömul og á 31 landsleik að baki fyrir Mexíkó. Hún getur leikið í hjarta varnarinnar og á miðjunni en hún var síðast á mála hjá norska úrvalsdeildarliðinu Arna-Bjornar.

Þór/KA samdi á dögunum við markvörðinn Bryndísi Láru Hrafnkelsdóttur og ljóst að Donni Sigurðsson ætlar sér stóra hluti með liðið næsta sumar.

Bianca lék síðast með Arna-Bjornar við góðan orðstír